დაბადება 

ჩვენი კომპანიის ისტორია 2005 წელს დაიწყო, როცა სამმა ბიჭმა : ირაკლი კუხიანიძემ, ანტონ კუხიანიძემ და ლევან შუბითიძემ, ინტერნეტ ავტო აუქციონის სახელით ახალი კომპანია დავაფუძნეთ. 

ამერიკიდან ავტომობილების იმპორტი მაშინ ახალი ხილი იყო და შეიძლება ითქვას, რომ ამ საქმეში პიონერები ვიყავით. ვისაც არ გახსოვთ, გაგახსენებთ, რომ ეს ის დროა, როცა ტრანსპორტირებისა და ლოჯისტიკური საკითხების „დალაგება“ ურთულესი ამბავი იყო და პორტში კონტეინერების ჩამოტვირთვა ჯერ კიდევ საკუთარი ხელებით გიწევდა, ასე რომ, თამამად შეგვიძლია ვთქვათ, რომ ჩვენს საქმეში, თავის დროზე, ყველაფერი საკუთარ ტყავზე გვაქვს გამოცდილი.

პირველი ნაბიჯები

შემდეგ წლებში, ნელ-ნელა სიტუაცია დალაგდა, თუმცა მალევე მოხდა 2008 წლის ომი, რომელმაც გასაგები მიზეზების გამო, ისევე როგორც მთელი ქვეყანა, ჩვენც დაგვაზარალა. მაგრამ, საბედნიეროდ, გამოთქმამ „რაც არ გვკლავს გვაძლიერებს“, ჩვენს შემთხვევაში იდეალურად იმუშავა და კრიზისული პერიოდის მერე, უფრო ძლიერებმა, გაასმაგებული ენერგიით გავაგრძელეთ ჩვენი საქმე და 2011 წელს პირველი მასშტაბური შედეგიც დავდეთ : გავხდით მსოფლიოში ერთ-ერთი უდიდესი ავტო აუქციონის, IAAI-ის ოფიციალური წარმომადგენლები საქართველოში, და პრინციპში, შეგვიძლია ვთქვათ, რომ ჩვენი კომპანიისათვის, ეს იყო გარდამტეხი მომენტი, ე.წ. turning point, რადგან ამის მერე დაიწყო პოზიტიური ცვლილებებისა და ზრდის ხანგრძლივი და შეუქცევადი ეტაპი.

ზრდა

ლოგიკურია, რომ გაფართოება თანდათანობით, სამეზობლოში, კავკასიის მასშტაბით დავიწყეთ, შესაბამისად, ჩვენი წარმომადგენლობები 2013 წელს, ჯერ აზერბაიჯანის, ხოლო 2015 წელს _ სომხეთის რესპუბლიკაში გავხსენით და 2019 წელს უკრაინამდეც მივაღწიეთ. 

რებრენდინგი

წლების მანძილზე შეძენილმა ცოდნამ, დაგროვილმა გამოცდილებამ და ერთგულმა ადამიანებმა, რომლებმაც კომპანიის ბირთვი ჩამოაყალიბეს, აშკარად დაგვანახა, რომ ჩვენი იდენტობა ბევრად უფრო მკაფიო გახდა, ვიდრე მხოლოდ IAAI-ის წარმომადგენლობა ნიშნავდა, უკვე სხვა მასშტაბზე ვოპერირებდით და მნიშვნელოვანი ცვლილებები იყო საჭირო. ასე მივედით რებრენდინგის აუცილებლობამდე და 2021 წელს Carmark-ად ვიქეცით.
 

ამჟამინდელი მდგომარეობა

ამ მომენტისათვის, ამერიკის ავტოაუქციონებიდან ჩამოყვანილი გვყავს 20 000-მდე ავტომობილი, Carmark-ის გუნდში კი ირიცხება 10 მუდმივი თანამშრომელი, 
საკუთარი საქმის პროფესიონალი და გულისხმიერი ადამიანები, რომლებსაც პერიოდულად, პროექტების მიხედვით, ათეულობით სხვა პროფესიონალიც ემატება. 

როგორც ქართულ, ისე საერთაშორისო ბაზარზე დავპარტნიორდით და ვთანამშრომლობთ უამრავ კომპანიასთან, რომელთა შორის არიან : VS brothers , IAAI,  ZMotorz, Tegeta Motors და სხვები.

გეგმები

ბრენდის მომავალი, ჩვენი მომხმარებლისგან ყოველდღიურ რეჟიმში მიღებული უკუკავშირის საფუძველზე განისაზღვრება, შესაბამისად, შეგვიძლია დავაანონსოთ, რომ სამომავლოდ, გვსურს ახალი სერვისების დამატება და ახალი ბაზრების ათვისება, 
რაც საშუალებას მოგვცემს, კიდევ უფრო გავამარტივოთ და ხელმისაწვდომი გავხადოთ ამერიკიდან ავტომობილის ჩამოყვანის პროცესი და ბაზარზე ისედაც საუკეთესო ტარიფები, კიდევ უფრო შევამციროთ.